କୋରାପୁଟ : ପୃଥିବୀ ପୃଷ୍ଠରେ ମଣିଷଙ୍କ ଭଳି ପଶୁପକ୍ଷୀମାନେ ମଧ୍ୟ ବଞ୍ଚିବାର ସମାନ ଅଧିକାର ଅଛି l ତେଣୁ ସେମାନଙ୍କ ସୁରକ୍ଷା ତଥା ପରିବେଶ ସୁରକ୍ଷା ପାଇଁ ଅଣ୍ଟା ଭିଡ଼ିଛନ୍ତି ଜଣେ ଯୁବ ପରିବେଶପ୍ରେମୀ ତଥା ଅଧ୍ୟାପକ ତ୍ରିନାଥ ପଟ୍ଟନାୟକ l ପରିବେଶ ସୁରକ୍ଷାର ବାର୍ତ୍ତା ନେଇ ବିଭିନ୍ନ ଅଞ୍ଚଳକୁ ଯାଇ ଗଛଟିଏ ଲଗାଇବା ପାଇଁ ଅନୁରୋଧ କରିଛନ୍ତି l ଶ୍ରୀ ପଟ୍ଟନାୟକ ଜଣେ ସମାଜସେବୀ ଏବଂ ଅମାୟିକ ଛାତ୍ରବତ୍ସଳ ଅଧ୍ୟାପକ ଅଟନ୍ତି l ଜଣେ ଅଧ୍ୟାପକ ହୋଇଥିଲେ ମଧ୍ୟ ନିଜକୁ ପାଠପଢ଼ା ମଧ୍ୟରେ ସୀମିତ ନ ରଖି ,ବିଭିନ୍ନ ସମାଜସେବା କ୍ଷେତ୍ରରେ ସେ ନିୟୋଜିତ ରହନ୍ତି l ଏହା ସହ ପଶୁପକ୍ଷୀଙ୍କ ପ୍ରତି ସର୍ବଦା ସମ୍ବେଦନଶୀଳ ହେବା ସହ ପ୍ରକୃତିର ସୁରକ୍ଷା ପାଇଁ ଅନେକ ସମୟରେ ବୃକ୍ଷରୋପଣ କାର୍ଯ୍ୟକ୍ରମରେ ଭାଗ ନେଇଥାନ୍ତି l
ଆଜି କୋରାପୁଟ ବାଗ୍ରା ପର୍ଯ୍ୟଟନ କ୍ଷେତ୍ରକୁ ନିଜ ପରିବାର ସହ ଯାଇ ବିଭିନ୍ନ ବୃକ୍ଷ ଯେପରିକି କରଞ୍ଜ, ସୀତା ଫଳ, ଅଁଳା, ନିମ, ଜାମୁ କୁଳି ପ୍ରମୁଖ ଗଛ ଲଗାଇ ପରିବେଶ ସୁରକ୍ଷା ଦିଗରେ ଅଣ୍ଟା ଭିଡିଥିବା ଦେଖା ଦେଇଅଛି l ଆଜିର ବୃକ୍ଷରୋପଣ କାର୍ଯ୍ୟକ୍ରମରେ ଯୁବ ପରିବେଶପ୍ରେମୀ ତଥା ଅଧ୍ୟାପକ ତ୍ରିନାଥଙ୍କ ସହ ତାଙ୍କ ଧର୍ମ ପତ୍ନୀ ନିତୁ(ଗେଲି)ଙ୍କ ସହ ପରିବାରବର୍ଗ ସାମିଲ୍ ହୋଇ ସହଯୋଗ କରିଥିବା ଦେଖିବାକୁ ମିଳିଅଛି l ଜଣେ ପ୍ରକୃତି ବନ୍ଧୁ ଭାବରେ ଯୁବ ଅଧ୍ୟାପକ ତ୍ରିନାଥ ଗତ ୨୦୨୦ ମସିହାରେ ରାଜ୍ୟ ସରକାରଙ୍କ ଜଙ୍ଗଲ ଏବଂ ପରିବେଶ ବିଭାଗ ପକ୍ଷରୁ ପ୍ରକୃତି ବନ୍ଧୁ-୨୦୨୦ ପୁରସ୍କାର ପ୍ରାପ୍ତ ମଧ୍ୟ ହୋଇଥିଲେ l ଶ୍ରୀ ପଟ୍ଟନାୟକଙ୍କ ଏଭଳି ପରିବେଶ ପ୍ରତି ରୂଚି ଦେଖି ବିଭିନ୍ନ ଅନୁଷ୍ଠାନ ତଥା ବୁଦ୍ଧିଜୀବୀ ମହଲରୁ ମଧ୍ୟ ଅଭିନନ୍ଦନର ସୁଅ ଛୁଟୁଛି l
